HISTORIA DA COPA DA COSTA (VII)

31ª EDICIÓN – TEMPORADA 1993-94

Equipos participantes	25
Campión	CAMARIÑAS F.C.
Subcampión	S.D. LAXE

Participan 23 dos 25 equipos que disputaron a Liga da Costa (2ª Rexional) e a nova 3ª Rexional, coas renuncias do At. Milagrosa e At. Mineiro, e 2 dos 4 equipos costeiros da 1ª Rexional (Camariñas e Cee, pois non o fixeron o Fisterra e o Nantón), para un total de 25 equipos; novamente fóra os da Preferente (Negreira e Sp. Zas). Da primeira rolda quedaron exentos Muros, Xallas, A Baña, Coristanco, Laxe, Carnota e Ponteceso. O máis destacado da primeira rolda foi a eliminación do actual campión e equipo da 1ª Rexional, o Cee, fronte ao Lira que se impuxo con facilidade nos dous encontros. O outro representante da categoría provincial, o Camariñas, desfíxose do Monte Louro, mentres que non tiveron apuros tampouco o Castriz, Mazaricos, Baio e Buño. O Outes pasou cun gol nos últimos minutos, e Corcubión necesitou a prórroga para desfacerse do Club do Mar e remontar un 2-0; pero quen logrou a gran remonta foi o Corme, que perdera en Esteiro 3-0 e logrou un 4-0 no Cairo.

Nos oitavos, moitas eliminatorias sentenciadas nos encontros de ida, como a do Camariñas fronte ao A Baña, a do Coristanco co Castriz, a do Baio co Carnota ou a do Buño co Ponteceso. O Corcubión gañoulle ao Muros 3-1 na ida, pero na volta os muradáns igualaron o marcador e na prórroga dous goles dos corcubioneses déronlles o pase. O Lira empatou co Xallas na ida, pero na volta o Xallas impúxose con moitos apuros. E a sorpresa estivo a piques de dala o Corme, que perdera na súa casa 1-3 co campión ligueiro Mazaricos, pero na Pedra de Ouro os cormeláns lograron igualar a contenda (0-2) e só os penaltis impediron que seguisen na competición. Os cuartos de final, xogáronse nun visto e non visto, pois entre o domingo e o martes festivo despacháronse estas eliminatorias, nas que o Camariñas non tivo problema en eliminar ao Coristanco (5-0 e 0-2), mentres que os outros enfrontamentos estiveron máis igualados. O Corcubión logrou vencer ao Xallas na ida cun gol no desconto (1-0), e na volta logrou un sorprendente empate que deixaba fóra a un do favoritos. Outro favorito era o Mazaricos, que se impuxo na casa ao Laxe (2-0), pero xa sabemos como as gastan os laxenses, que na volta xa case sentenciaran o pase na primeira parte e acabaron vencendo 4-1. Por último, o Baio tivo serios problemas para desfacerse do Buño, a pesar de que logrou vencer nos dous encontros (1-0 e 2-3).

Nas semifinais, o Corcubión enfrontouse ao Camariñas no Cubaleiro e deu a sorpresa ao vencer por 2-1; os dous primeiros goles de dúas futuras figuras costeiras: polos locais do xuvenil Noé, ao que respondeu o camariñan Juan Cabrejo; outro xuvenil fisterrán en terras corcubionesas, Santi, poñería o definitivo 2-1. Na volta, o Camariñas adiantouse cun penalti convertido por Juan, e no segundo tempo Pepucho ampliou distancias, pero Chisco axiña igualou a eliminatoria, e tivo que ser no desconto cando un gol de Guillermo impedise a prórroga. Na outra semifinal, o Laxe recibía a outro galo, o Baio, subcampión ligueiro, e no Cabo da Area xogouse o primeiro partido, no que un gol inicial do baiés Lilo foi igualado antes do descanso por Fran; nada máis iniciarse o segundo período Diego anota o segundo para os locais, e a falta de cinco minutos empata Bareta de penalti, pero pouco despois Diego volve marcar para poñer o 3-2 definitivo. Na volta, no Platas Reinoso, os laxenses defendéronse ben e conseguiron manter a porta a cero, polo que deron a sorpresa e coáronse na final deixando fóra ao Baio.

Sexta final para o Laxe e terceira para o Camariñas, que era quen figuraba como anfitrión do partido de ida. O 5 de xuño un forte vento foi o protagonista do encontro, que acabou sen goles na primeira parte, pero que no arranque do segundo tivo dous seguidos por parte local, ao que lle seguiron outras dúas expulsións dos camariñáns José Marta (min.60) e Berto (min.65), que lles deron folgos aos visitantes e a dez para o remate lograban deixar aberta a final para a volta. Aquí o vento continuou sendo protagonista e os goles fixéronse de rogar, pois non chegaron ata os minutos finais e foron a favor do Camariñas, que tras perder dúas finais, podía por fin levantar a Copa da Costa. Os máximos goleadores desta edición foron os camariñáns Juan Cabrejo e Pepucho, con 8 goles, seguidos, con 7, por Chisco (Corcubión) e Isidro (Baio).

FINAL IDA (05-06-1994)
CAMARIÑAS F.C.	Vicente, Vigo, Berto, Víctor, Tito, José Marta, Julián (Andrés 55), Tono, Juan, Guillermo, Pepucho.
S.D. LAXE	Fermín, Pepe, Juan, Sindo, Óscar, Diego (Víctor 80), Manel Pallas, Fran de Laxe, Tino (Fran de Vimianzo 10), Toni, Lucho.
Goles	1-0 Juan (p.,55), 2-0 Pepucho (59), 2-1 Fran de Laxe (80).
FINAL VOLTA (12-06-1994)
S.D. LAXE	Fermín, Pepe, Sindo, Juan (Víctor 88), Óscar (Miguel 69), Beizana, Fran de Laxe (Fran de Vimianzo 88), Manel Pallas, Paco, Toni, Lucho. Adestrador: Sindo/Feluxo
CAMARIÑAS F.C.	Vicente, Vigo, Julián, Víctor, Tito, Gerpe, Andrés (Marcos 90), Tono, Juan (Javi 82), Guillermo, Pepucho (Ramón 93). Adestrador: José Pasantes 'Camuel'
Goles	0-1 Andrés (86), 0-2 Guillermo (p., 92).

O Camariñas FC no partido de volta en Laxe [Foto: JMF]

32ª EDICIÓN – TEMPORADA 1994-95

Equipos participantes	26
Campión	CAMARIÑAS F.C.
Subcampión	S.D. SAN LORENZO

Participan os 26 equipos, os 13 da Liga da Costa, 9 da 3ª Rexional e 4 da 1ª Rexional (coa renuncia do Cee), pero non os da Preferente (Negreira e Sp. Zas). Seis equipos quedaron exentos da primeira rolda: Monte Louro, Ponteceso, Cabana, At. Mineiro, Malpica e At. Milagrosa, aos que se sumou o Fisterra logo de que A Baña se retirase unha vez efectuado o sorteo. A eliminatoria estrela era a que enfrontaba a campión e subcampión da Liga da Costa, pero o Lira desfíxose sen problemas do Xallas, que non se parecía nada ao do campionato ligueiro, pois as súas estrelas -Isidro, Miculita, Noé, Papi- emigraran para o Ponteceso da man do míster Manín. A sorpresa veu da eliminación dun dos equipos de Primeira, o Mazaricos, da man do Muros, e o Camariñas tivo moitos problemas para desfacerse do Coristanco. Sen apuros pasaron o Corcubión, Baio, San Lorenzo, Buño e Laxe, mentres que o Carnota sufriu ata última hora para deixar fóra ao Castriz.

Interesantes eliminatorias nos oitavos, cun enfrontamento entre dous equipos de Primeira, na que o Camariñas se impuxo na ida ao Fisterra (2-0), pero os fisterráns lograron poñerse na volta 3-1, pero a dianteira camariñá Chema-Guillermo sentenciou nos minutos finais (3-4). O Ponteceso de Manín atopouse co campión ligueiro Lira e logrou vencer no Municipal 2-0, e ir gañando 1-3 en Portocubelo, pero os lirachos non dixeron a última palabra e a piques estiveron de forzar a prórroga (4-3). A sorpresa veu da eliminación do Baio co San Lorenzo, que goleou nas Pedreiras ao equipo de 1ª Rexional (3-0). O Laxe eliminou sen problemas ao At. Milagrosa, o At. Mineiro ao Buño e o Cabana ao Muros, mentres que o Carnota gañou en Malpica para facer bo o empate da ida; máis problemas tivo o Corcubión para desfacerse do Monte Louro.

Nos cuartos, o Corcubión deu a sorpresa ao endosarlle unha man no encontro de ida ao todopoderoso Ponteceso (5-0), que o intentou na volta pero foille imposible (2-0). O Camariñas sufriu para gañar como local ao At. Mineiro (1-0), pero en Santa Comba sentenciou o pase (0-2). No duelo entre dous de 3ª Rexional, o Laxe mostrou as súas credenciais copeiras e non atopou rival no campión ligueiro Carnota, e venceu nos dous partidos (1-2 e 5-1). Máis igualada estivo a eliminatoria entre o Cabana e San Lorenzo, con empate na ida (1-1) e vitoria dos verdilleses na prórroga nas Pedreiras (2-1). As semifinais foron bastante emocionantes, cun Corcubión-San Lorenzo, que tivo un igualado partido de ida que acabou con vitoria mínima para os locais cun gol de Chisco (1-0). A volta nas Pedreiras acabou nos 90 minutos con similar marcador, grazas ao gol de Manín, polo que houbo que xogar a prórroga, na que Chisco marcou para os corcubioneses e no último minuto Montero puxo o definitivo 2-1, co que a quenda de penaltis tiña que decidir o finalista e aí os verdilleses impuxéronse por 3-2. Na outra semifinal, o Camariñas tivo que remontar na segunda parte o gol inicial do laxense Óscar, pero Chema, Juan e Guillermo puxeron o 3-1 co que rematou o partido de ida. Na volta no Cabo de Area moitos goles, pois axiña Pablo Casal puxo por diante aos locais, pero Pepucho logo igualou; no segundo tempo Chema e Juan ampliaron vantaxe para os visitantes, pero Sindo marcaba para os locais antes de que nos minutos finais Pepucho completase con outros dous goles o seu hat-trick e Ambrosio puxese o definitivo 3-5.

Cuarta final para o Camariñas, segunda consecutiva, e primeira para o San Lorenzo de Verdillo. O partido de ida xogouse nas Pedreiras o 18 de xuño, e a eficacia do Camariñas foi letal para o San Lorenzo e en pouco máis dun cuarto de hora xa estaba sentenciada a final, catro goles antes do descanso, que os verdilleses recortaron na segunda parte, pero novamente o Camariñas puxo terra polo medio, para maquillar un pouco o resultado ao final o San Lorenzo (2-5). José Marta, cun dobrete, e Guillermo, cun hat-trick, foron os matadores dos camariñáns. O partido de volta trouxo moitos goles, ocasións, e unha desastrosa actuación arbitral ao dicir das crónicas. Pasada a media hora os dous quedaron cun home menos polas expulsións de Gerpe e Chema, que foron o preludio do primeiro gol marcado de penalti (inexistente disque) por Juan; un novo expulsado, o camariñán Guillermo, antes dun descanso que chegou logo de 55 minutos, debido ás continuas liortas. Mediada a segunda parte, empata o San Lorenzo de penalti (tamén inexistente disque) por medio de Montero. Nos últimos minutos, Pepucho, Tono e Andrés marcaron os tres restantes goles do Camariñas para poñer o 4-1 final. Segunda Copa da Costa para o Camariñas consecutiva, que tivo o detalle de homenaxear na previa a 26 ex-xogadores que forman parte da historia do club, entre eles o porteiro-adestrador Vicente, que colgaba os guantes logo da final. O máximo goleador da Copa foi Guillermo (Camariñas), con 9 goles, seguido de Ambrosio (Laxe), con 8.

FINAL IDA (18-06-1995)
S.D. SAN LORENZO	Juan, Montero, Fran, Francés, Víctor, Eirís, Manín (Cotelo 92), Luis, Fontes (Gustavo 78), Óscar, Iván. Adestrador: José Antonio Vilas.
CAMARIÑAS F.C.	Vicente, Gerpe, José Triñáns (Ramón 82), Berto, Luis, Chema (Andrés 67), Tono, Juan (Marcos 78), Pepucho, Guillermo (Suxo 82), José Marta. Adestrador: Vicente Carril.
Goles	0-1 José Marta (14), 0-2 José Marta (15), 0-3 Guillermo (18), 0-4 Guillermo (31), 1-4 Montero (p.,62), 1-5 Guillermo (79), 2-5 Iván (82).

Celebración da 2ª Copa da Costa do Camariñas FC. [Foto: JMF]

33ª EDICIÓN – TEMPORADA 1995-96

Equipos participantes	27
Campión	LIRA C.F.
Subcampión	S.D. SAN LORENZO

Participan 27 equipos, os 14 da Liga da Costa, os 9 da 3ª Rexional e os 3 da 1ª Rexional, e por vez primeira decidiuse abrir a participación aos equipos da Preferente, aínda que dos cinco equipos costeiros na categoría só participou o Sp. Zas, renunciando a facelo o Baio, Bergantiños, Cee e Negreira. Por vez primeira introducíase o valor dobre dos goles en campo contrario no caso de empate. Cinco equipos quedaron exentos da previa: Nantón, Malpica, Fisterra, Sp. Zas e Buño, aos que se uniu o Camariñas tras a retirada do Muxía logo do sorteo. Entre as eliminatorias destaca a que enfrontou ao campión da Liga da Costa, o Corme, co campión da 3ª Rexional, o At. Milagrosa, con vitoria carballesa no Cairo (2-3) e remonta cormelá na volta (0-3). Clasificacións doadas para Carnota, Mazaricos, Ponteceso, Lira e Cabana, e algo máis axustadas para San Lorenzo, Monte Louro e Corcubión. O primeiro enfrontamento que acabou decidindose polo valor dobre dos goles foi o derby xalleiro entre o Castriz e o At. Mineiro, no que pasaron os primeiros.

Nos oitavos de final, o choque máis interesante era o que enfrontaba a Fisterra e Corme, que terminou con mínima vitoria cormelá no Ara Solis e empate no Cairo. A sorpresa veu da eliminación do único equipo da Preferente, o Sp. Zas, que despois de empatar en Lombáns, vía como o Carnota se impuña no San Andrés. O Lira goleou ao Cabana na ida e xa deixou a eliminatoria sentenciada, mentres que o Camariñas tivo que facelo no encontro de volta. O Mazaricos impúxose ao Castriz nos dous partidos, ao igual que o Buño co Ponteceso, mentres que o San Lorenzo tivo que suar para desfacerse do Malpica para remontar nos últimos minutos. O Monte Louro-Corcubión, logo de senllos empates, resolveuse na prórroga con dous goles corcubioneses.

Nos cuartos, tres eliminatorias xa quedaron sentenciadas nos encontros de ida. O Camariñas-San Lorenzo era a repetición da final da edición anterior, e os de Verdillo puideron desquitarse gañando no Hnas. Patiño por un contundente 0-4, que refrendaron na casa cun empate (0-0). O Corme tamén se impuxo no Cairo por 4-0 ao Mazaricos, e aínda que estes o intentaron na volta non foi suficiente (3-1). O Carnota impuxo a súa superioridade no segundo tempo ante o Corcubión no desterro de Dumbría (1-3), que remataron cunha vitoria mínima en Lombáns (1-0). Máis igualado estivo o enfrontamento entre Buño e Lira, no que os oleiros se impuxeron por 2-1 en Xaviña con dous goles nos minutos finais; na volta en Porto Cubelo os lirachos remontaron cun penalti no último minuto que igualaba a contenda e forzaba a prórroga, na que outro gol do Lira dáballe o pase ás semifinais. 

Na penúltima rolda, houbo por un lado un derby bergantiñán e polo outro un derby municipal. San Lorenzo e Corme enfrontáronse en Verdillo na ida, con resultado final de empate (1-1), con goles de Torreira para os locais e Javi para os visitantes; na volta en Corme, mesmo resultado e mesmos goleadores nos 90 minutos, polo que houbo que chegar á prórroga, na que decidiu un gol de Pablo Casal para o San Lorenzo. Na outra, Carnota e Lira enfrontáronse en Lombáns, con mínima vitoria local (2-1), logo de que Bori e Sieso Jr. remontasen nos últimos minutos o gol inicial de Domingo; en Portocubelo, Carlos adiantou aos locais ao comezo do segundo tempo, pero axiña empatou Weri para o Carnota, e a dez do final de novo Carlos poñia o 2-1 definitivo de penalti. Tras xogarse a prórroga sen goles chegouse á quenda de penaltis, na que tiveron que tirar cadanseus oito penaltis para que ao final se clasificase o Lira.

Repetía final da Copa da Costa o San Lorenzo e debutaba nela o Lira. Os lirachos eran favoritos por estar nunha categoría superior, pero os verdilleses foran subcampións da Liga da Costa. Na ida xogada en Portocubelo houbo moito igualdade, aínda que con máis ocasións para os locais, que non encontraron o gol ata mediado o segundo período. Tras a expulsión de Torea no minuto 83, o San Lorenzo tratou de sacar proveito pero non converteu as súas ocasións e o partido rematou con vitoria mínima (1-0). A volta nas Pedreiras logo perdeu emoción, pois o Lira logo se adiantou no marcador, e non tardou en ampliar o marcador; chegarían máis goles no último cuarto de partido para pecharse cun 1-4 que lle deu ao Lira a súa primeira Copa da Costa. O máximo goleador foi Sieso Júnior, do Carnota, con 8 goles, seguido de Carlos (Lira), con 7, e Pablo Casal (San Lorenzo), con 6.

FINAL IDA (26-05-1996)
LIRA C.F.	Mariano, Bruno, Manolo, Moma, Pana (Lires 64), Torea, Iván Pequeño, Cambeiro, Carlos, Domingo, Augusto.
S.D. SAN LORENZO	Juan, Marcos, Eirís (Fontes 71), Francés, Víctor, Montero (Iván 89), Torreira, Pombo, Gustavo (Manín 76), Pablo Casal, Óscar.
Goles	1-0 Iván Pequeño (68).
FINAL VOLTA (02-06-1996)
S.D. SAN LORENZO	Juan (Pablo Pena 82), Marcos, Víctor, Fran, Francés, Torreira, Montero, Manín, Pombo (Gustavo 82), Pablo Casal (César 65), Óscar. Adestrador: José Antonio Vilas.
LIRA C.F.	Diego, Pana (Óscar 77), Sieira (Jorge 82), Manolo, Moma, Iván Pequeño, Carlos, Bruno, Cambeiro, Domingo (Lires 85), Augusto. Adestrador: Amador Carballo
Goles	0-1 Bruno (8), 0-2 Iván P. (24), 0-3 Augusto (69), 1-3 Óscar (74), 1-4 Domingo (82).

O Lira CF celebrou a súa 1ª Copa da Costa 

34ª EDICIÓN – TEMPORADA 1996-97

Equipos participantes	28
Campión	S.D. FISTERRA
Subcampión	PONTECESO S.D.

Participaron os 14 equipos da Liga da Costa, os 11 da 3ª Rexional e tres de 1ª Rexional (Camariñas, Cee e Fisterra; o Corme renunciou). No sorteo houbo unha votación para determinar a presenza ou non dos equipos da 1ª e da Preferente, e decidiron os clubs que participasen os de 1ª pero non os da Preferente (Baio, Bergantiños e Sp. Zas). Quedaron exentos da primeira rolda Dumbría, Outes, Muxía e Laxe. As eliminatorias estiveron marcadas pola volta da violencia contra os árbitros. O Camariñas-Ponteceso foi suspendido a falta de cinco minutos polo colexiado tras a liorta pola cuarta expulsión dos locais; o 0-3 que sinalaba o marcador foi decretado como definitivo, e na volta o Ponteceso completou a sorpresa cun 5-1. Outro partido que non chegou ao final foi o Muros-Castriz, que tras o 0-0 en terras xalleiras, sinalaba un 1-2 cando un xogador muradán intentou agredir o colexiado. A clasificación do Camelle fronte ao Nantón foi outra das sorpresas desta rolda, mentres que non tiveron problemas Malpica, Xallas, Soneira, Fisterra, Carnota, Lira, Buño, Cee e San Lorenzo.

Nos oitavos, dous equipos da 3ª Rexional loitaban por chegar aos cuartos, e foi o Dumbría o que pasou ao gañar en Camelle; o Malpica non tivo problemas para desfacerse do Xallas e gañou os dous partidos, mentres que o Soneira tivo que agardar á volta para lograr clasificarse logo de gañarlle ao Castriz. Tremenda goleada a do Carnota, que lle endosou un 12-1 ao Muxía no encontro de volta, logo dun 0-2 na Arliña. Sufriu máis do que contaba o Fisterra co Outes, pois tras o 4-2 do Ara Solis os outienses só lograron gañar 1-0 a pesar de xogar con dous xogadores máis a última media hora. O San Lorenzo desfíxose do Laxe gañando os dous partidos, mentres que o Ponteceso eliminou ao campión da pasada edición ao gañar na volta no Municipal tras o empate de Lira. Por último, o Cee clasificouse despois de novos incidentes; tras o 1-1 de Buño, estaba moi igualado o partido nas Raíces co 1-0 no marcador cando un xogador visitante agrediu o colexiado -a Federación daría por rematado o partido-.

Nos cuartos, o Malpica tras gañar en Dumbría 0-2, non tivo piedade e logrou un 10-1 na Pedra Queimada. Espectacular Soneira-Fisterra, cun empate no Municipal vimiancés (4-4) e vitoria dos fisterráns no Ara Solis (3-1). Carnota e Ponteceso empataron en Lombáns (1-1), e no Municipal os pontecesáns venceron por 2-0. Tamén acabou en empate (0-0) o partido de ida entre o Cee e o San Lorenzo, e na volta nas Pedreiras trepidante encontro que rematou con triunfo ceense por 3-4. 

Nas semifinais, enorme semifinal entre o campión da Liga da Costa, o Malpica, e o Fisterra, o mellor dos costeiros da 1ª Rexional. Na ida na Pedra Queimada, o Malpica adiantouse con dous goles obra de Manuel e Yoyo, pero César lograba o gol do Fisterra a pouco para o final; na volta no Ara Solis, un solitario gol marcado por Marco no lanzamento dun penalti no segundo tempo dáballe a clasificación. Na outra, tamén pelexaban un equipo da 1ª contra un da 2ª, xogándose a ida no Municipal de Ponteceso: adiantouse o Cee cun gol de Pereira, pero axiña empatou Bardanca, e ao pouco de iniciarse o segundo tempo Miguel poñía o definitivo 2-1. A volta en Cee estivo marcada polos incidentes: tras unha primeira parte igualada e sen goles, no último minuto era expulsado o local Leo, e aos dez minutos da segunda era José Carlos o que tamén vía o vermello; con dous homes de máis o Ponteceso lograba marcar por medio de Vituco, pero aínda así o Cee logrou a igualada a falta de dez minutos cun gol de Diego, pero de novo Vituco puxo ao Ponteceso por diante, e acto seguido chegou a expulsión de Luis e a suspensión do encontro por agresión ao colexiado. O 1-2 foi declarado resultado definitivo.

A pesar de ser a sexta final para o Fisterra e para o Ponteceso nunca cadraron os dous xuntos nunha final da Copa da Costa. O partido de ida xogouse no Ara Solis o 1 de xuño, e os fisterráns deixaron sentenciada a final cun claro 3-0, con dous goles cando apenas se levaban quince minutos de partido; a partir de aí reaccionou o Ponteceso e tivo varias ocasións moi claras pero non as marcou e quen o fixo foi o Fisterra, que mediada a segunda parte logrou o terceiro. Na volta, o Ponteceso viu frustradas as súas ansias de remonta co gol no inicio do fisterrán Marco -o terceiro na final-, pero o adestrador-xogador Bardanca logrou o empate antes do descanso, e logrou marcar o segundo mediado o segundo período, pero foi insuficiente, polo que o 2-1 dáballe a súa segunda Copa da Costa ao Fisterra. O máximo goleador desta edición foi Weri (Carnota), con 9 goles, seguido por Bardanca (Ponteceso), con 7, e Marco (Fisterra), con 6.

FINAL IDA (01-06-1997)
S.D. FISTERRA	Charly, Llanero, Juan Bautista, Falito, Santi, Buján, Serguei, Rubén, Marco, Noé (Vaamonde 82), Pesca (Joaquín 87).
PONTECESO S.D.	Chicho, Alfonso, Marcos (Quito 20 (Roi 84)), Miguel, Ángel, Alexo, Chus, Echegaray (Salva 73), Alfredo (Suárez 65), Vituco, Jaime.
Goles	1-0 Marco (p.,13), 2-0 Marco (16), 3-0 Noé (69)
FINAL VOLTA (08-06-1997)
PONTECESO S.D.	Chicho, Ángel, Echegaray (Marcos 75), Alexo, Miguel, Alfredo (Salva 20), Alfonso, Quito, Chus, Bardanca, Vituco. Adestrador: Javier Bardanca
S.D. FISTERRA	Charly, Llanero (Joaquín 56), Bautista, Falito, Serguei, Santi, César (Pumuki 81), Rubén, Marco (Jesús Ángel 89), Pesca, Noé. Adestrador: Juan Ramón Lobelos
Goles	0-1 Marco (8), 1-1 Bardanca (39), 2-1 Bardanca (72)

 

O Fisterra SD volvía gañar a Copa da Costa logo de 18 anos [Foto: JMF]

35ª EDICIÓN – TEMPORADA 1997-98

Equipos participantes	32
Campión	AT. MINEIRO
Subcampión	S.D. FISTERRA

Participaron os 14 equipos da 2ª Rexional e os 14 da 3ª Rexional, xunto con tres dos cinco da 1ª Rexional (Bergantiños, Fisterra e Sp. Zas; renunciaron o Corme e o Malpica) e o da Preferente (Baio), para sumar un total de 32 participantes. Curiosamente, no sorteo houbo dúas votacións: unha para determinar a presenza ou non do Baio como equipo da Preferente, e outra para a presenza ou non do Bergantiños (a dos outros da 1ª Rexional non se cuestinou); ao final aprobouse a participación dos dous, aínda que os baieses tiveron máis votos a favor que os bergantiñáns. Nos dezaseisavos de final, o máis destacado foi a eliminación do Baio ante o At. Mineiro por goleada nos dous partidos, aínda que os baieses tiraron dos xuvenís para esta competición; tamén foi sorprendente a eliminación do campión da Liga da Costa, o Ponteceso, ante un irregular Cee. Equipos da 2ª Rexional quedaron fóra fronte a outros da 3ª como o Camariñas co Coristanco ou o Soneira co Nantón; mentres que destacou o derby entre Carnota e Lira, que foi favorable para estes últimos, ao igual que o Malpica B eliminou o Buño. Muros, Mazaricos, Fisterra, Sp. Zas, Xallas e Bergantiños non tiveron problemas para pasar, mentres que máis axustada estivo a clasificación de At. Milagrosa, San Lorenzo, Cabana e Sofán.

Nos oitavos, varias eliminatorias foron resoltas xa na ida, como a do Fisterra fronte ao Lira, a do Sp. Zas co Coristanco, a do At. Mineiro co Malpica B, a do Cabana contra o Sofán. Pero a sorpresa veu da vitoria do Xallas sobre o Bergantiños (4-1), con catro goles de Capelo, que tamén marcaría no empate da volta (1-1). O San Lorenzo gañoulle os dous partidos ao Nantón, e polo valor dobre dos goles en campo contrario pasaron o Muros fronte ao Mazaricos e o Cee contra o At. Milagrosa. Nos cuartos, o Fisterra gañou en Muros (2-3) e rematou a faena no Ara Solis (3-0); o Sp. Zas cumpriu os prognósticos e gañoulle os dous partidos ao Cee (2-0 e 0-1). No derby xalleiro non houbo historia e o subcampión da Liga da Costa, o At. Mineiro, non tivo piedade do Xallas e gañou os dous encontros (0-6 e 2-0); mentres que o Cabana deu a sorpresa ao gañar en Verdillo (1-2), pero o San Lorenzo reaccionou e pasou ao vencer nas Redondas (0-2).

Nas semifinais, por unha parte estaban os dous equipos da 1ª Rexional que iniciaron o seu enfrontamento no Ara Solis, no que se adiantou Fatino para o Sp. Zas e Velay puxo o empate para o Fisterra (1-1) que o deixaba todo para a volta; en San Andrés, Velay e Rubén axiña marcaban para os fisterráns, e Buján aumentou a distancia no segundo tempo, e a pesar de que Julián con dous penaltis logrou meter o Zas no partido, Velay disipou dúbidas co 2-4 definitivo. Na outra semifinal estaban dous equipos da Liga da Costa, con favoritismo para o At. Mineiro, que gañou na ida pola mínima cun gol de Mourón (1-0), e na volta axiña confirmou os prognósticos ao marcar de novo Mourón e logo Óscar, mentres que o gol de Quico para o San Lorenzo serviu para poñer o 1-2 definitivo.

Un directivo da FGF tivo que entregarlle a Copa da Costa ao At. Mineiro
ao comezo da temporada seguinte [Foto: Santacombanamemoria]

Sétima final para o Fisterra, que repetía do ano anterior, mentres que o At. Mineiro debutaba como finalista da Copa da Costa. O 31 de maio xogouse o partido de ida no Ara Solis, e foi tremendamente emocionante, cun expulsado por parte fisterrá aos 5 minutos (Joaquín), que foi preludio do primeiro gol xalleiro, pero os fisterráns non se renderon e lograron tres goles antes de chegar o descanso; pero na segunda parte pagaron o esforzo e o At. Mineiro logrou a igualada (3-3) e tamén se igualou en homes coa expulsión de Argote. Moita expectación na Fontenla, con 2000 persoas para ver un partido que non chegaría ao final ao quedar o Fisterra con menos xogadores no campo dos regulamentarios. O primeiro tempo non tivo goles pero si tivo polémica coa expulsión do fisterrán César no minuto 25 e pouco despois do xalleiro Sergio. No comezo do segundo período chegaron dous goles para os locais, o segundo dos cales provocou unha liorta entre os xogadores visitantes e o trío arbitral, que rematou cunha agresión ao xuíz de liña e tres expulsados (Buján, Santi e Marcote); o partido estivo suspendido varios minutos, e ao reiniciarse o xogo o adestrador fisterrán fai todos os trocos e acto seguido un xogador visitante cae lesionado, polo que o Fisterra quedaba con menos xogadores dos permitidos e chegábase tristemente ao remate da final da Copa. Houbo que agardar ata o mércores seguinte para que a Federación confirmase que o At. Mineiro gañaba a súa primeira Copa da Costa e o trofeo de campión sería entregado ao comezo da temporada seguinte. O máximo goleador foi Mourón (At. Mineiro), con 12 goles.

FINAL IDA (31-05-1998)
S.D. FISTERRA	Rafa, Chus, Serguei, Pumuki, Sergio Pais (Sergio 87), Buján (Marcote 90), Juan Jesús, César, Joaquín, Marco, Velay.
AT. MINEIRO	Juan Carlos, Javier Facal (Sergio 46), Emilio, Luis, Alvite, Argote, Leví, Ces, Mourón, Miguel, Óscar (Recarey 87).
Goles	0-1 Leví (11), 1-1 Marco (26), 2-1 Buján (28), 3-1 César (45), 3-2 Miguel (57), 3-3 Mourón (79)
FINAL VOLTA (07-06-1998)
AT. MINEIRO	Juan Carlos, Javier Facal, Emilio, Luis, Orlando, Sergio, Leví, Ces, Mourón, Miguel, Óscar.
S.D. FISTERRA	Rafa (Charly 67), Chus (Juan Luis 67), Pumuki, Serguei, Sergio Pais (Sergio 67), Buján, Juan Jesús (Ángel 67), Santi, César, Marcote, Marco.
Goles	1-0 Miguel (49), 2-0 Miguel (55)

O At. Mineiro gañou a súa 1ª Copa da Costa [Foto: Santacombanamemoria]

HISTORIA DA COPA DA COSTA (VI)

26ª EDICIÓN – TEMPORADA 1988-89

Equipos participantes	27
Campión	U.D. CORCUBIÓN
Subcampión	S.D. LAXE

Participan os 27 equipos que disputaron as ligas costeiras da 1ª e 2ª Rexional, quedando fóra os cinco equipos que estaban na Preferente (Baio, Camariñas, Cee, Negreira e Xallas). Deses 27 equipos tres deles retiráronse despois de realizado o sorteo (Esteirana, Leiloio e Muros), polo que Muxía, At. Mineiro e Malpica pasaron sen xogar, engadíndose aos exentos Agualada, Corcubión, Coristanco, Lira e Ponteceso. Polo tanto, foron oito as eliminatorias que se xogaron na previa, aínda que unha non se completou pola incomparecencia do Freixo ao partido de volta co Sp. Zas tras caer goleado na ida. A confrontación máis interesante foi a Cabana-Fisterra, no que tras o empate da ida os cabaneses gañaron en campo fisterrán. Lamentables os incidentes que non permitiron que ningún dos dous partidos entre o Soneira e o Carnota chegasen á súa fin, tendo que suspendelos os colexiados por incidentes do público e dos xogadores contra eles. A Federación decretou a clasificación do Carnota -que gañara os dous encontros- sen que tivesen que xogarse os minutos finais; xunto a el pasaron o Camelle, Outes, Nantón, Bergantiños B e Laxe.

Nos oitavos, o Corcubión sufriu demasiado para superar ao Agualada, o Cabana goleou nos dous partidos ao At. Mineiro, o Camelle estivo a piques de dar a sorpresa ante o Malpica, e quen a dou foi o Coristanco, que deixou fóra ao subcampión ligueiro, Outes. Tres equipos da 2ª Rexional deixaron fóra a tres da 1ª: Sp. Zas desfíxose facilmente do Nantón, o Bergantiños B goleou na volta ao Ponteceso e o Club do Mar remontou ante o Carnota; e o Muxía, campión da 2ª Rexional, a piques estivo de facer o mesmo co Lira, pero os penaltis estiveron de parte dos lirachos. Nos cuartos de final, a eliminatoria entre o Corcubión, campión ligueiro, e o Cabana, terceiro, prometía emocións fortes, e así foi, pois tras o empate no Cubaleiro (2-2), nas Redondas tamén quedaron igualados (1-1), polo que o pase se dilucidou nos penaltis, nos que o porteiro corcubionés Lois estivo acertado e parou dous para clasificar ao Corcubión. O Coristanco impúxose no partido de ida na Rocheira (3-1) e soubo igualar na volta en Pedra Queimada (3-3) para chegar ás semifinais. O Sp. Zas seguía coas sorpresas e impoñíase en San Andrés pola mínima (1-0) a un Ponteceso que non logrou remontar na volta (1-1). E o Laxe seguía dando mostras do seu poder como equipo copeiro e sentenciaba a eliminatoria na ida cun claro 4-1 ante un Lira que non puido nin gañar en Portocubelo (1-1).

Nas semifinais, o Corcubión recibía como favorito ao Coristanco, pero os da terra da pataca lograron adiantarse cun gol de Neira, pero a mala sorte cebábase cos bergantiñáns ao marcar o porteiro Juan José en propia meta o gol do empate no desconto da primeira parte, e na segunda Javier de penalti daríalle a vitoria mínima ao Corcubión (2-1). Na volta na Rocheira, o Coristanco saíu a por todas en chegou ao descanso gañando por dous goles, obra de Juan, pero no segundo tempo o Corcubión logrou empatar cos goles de Chisco e Mario, o que lle daba a clasificación. Na outra eliminatoria, entre dous equipos da 2ª Rexional, o Laxe deixou sentenciado o pase ao vencer en San Andrés ao Sp. Zas por 0-3, con goles de José (pp), Chopena e Víctor. No Cabo da Area o Sp. Zas intentou a remonta e Balsa marcou o gol da esperanza, pero no segundo período Paco empatou o partido e sentenciou o pase do Laxe ao final.

Repetíase a final da edición anterior entre o Corcubión e o Laxe, e o 18 de xuño no Cabo de Area xogábase o partido de ida. Poucas oportunidades no encontro, coa máis clara para os locais nun lanzamento de penalti errado, mentres que os corcubioneses non aproveitaron a superioridade numérica pola expulsión do xogador-adestrador laxense Feluxo. Polo tanto, co 0-0 quedaba a resolución para o Cubaleiro. O 25 de xuño unha inxente cantidade de público ateigaba o recinto corcubionés, que viron un entretido partido, pero sen a salsa que son os goles. E tras 210 minutos de xogo entre estes dous equipos houbo que decidir o campión nos penaltis. Logo de seis lanzamentos por cada equipo, o Corcubión lograba repetir título e alzarse coa súa segunda Copa da Costa e co dobrete nesta temporada. O máximo goleador do torneo foi Juan (Coristanco), con 8 goles.

FINAL IDA (18-06-1989)
S.D. LAXE	Porras, Rivera, Eladio, Juan, Jorge II, Chopena, Pablo, Paco, Feluxo, Víctor, Sergio (Miguel 73).
U.D. CORCUBIÓN	Lois, Alfonso, Lema, Lalo, Fran, Santi, Manín, Jorge (Mario 58), Dadi II, Chisco, Dadi I (Fuentes 80).
FINAL VOLTA (25-06-1989)
U.D. CORCUBIÓN	Lois, Lalo, Fran, Lema, Alfonso, Gorri (Jorge 46), Manín, Rivelino (Mario 75), Chisco, Dadi I, Javier. Adestrador: José López 'Manín'.
S.D. LAXE	Porras, Rivera, Pol (Eladio 46), Juan, Jorge II, Chopena, Paco, Pablo, Miguel, Víctor (Sergio 76), Feluxo. Adestrador: 'Feluxo'.
Penaltis	Lema (1-0), Miguel (para Lois); Javier (2-0), Paco (2-1); Jorge (3-1), Juan (3-2); Alfonso (4-2), Chopena (4-3); Manín (para Porras), Pablo (4-4); Mario (5-4), Rivera (para Lois).

A UD Corcubión repetía como campión

27ª EDICIÓN – TEMPORADA 1989-90

Equipos participantes	26
Campión	C.D. NANTÓN
Subcampión	PONTECESO S.D.

Participan 26 dos 28 equipos que competiron na Liga da Costa (1ª Rexional) e 2ª Rexional, coas baixas voluntarias do Freixo e do Muros; ademais acordaron os clubs por votación no momento do sorteo a exclusión dos equipos da Preferente (Camariñas, Cee e Negreira). Quedaron exentos da primeira rolda o Corcubión, Nantón, Baio, Corme, Carnota e Fisterra. O sorteo desta primeira volta deparou un duelo estelar, pois enfrontáronse o campión e subcampión da Liga da Costa, o Cabana fronte ao Malpica, que tivo menos historia da agardada, pois os cabaneses impuxéronse nos dous partidos polo mesmo resultado: 3-0. A única sorpresa veu da eliminación do Coristaco fronte ao Bergantiños B, ao remontar na Rocheira o marcador adverso que traía o filial. No resto, vitorias folgadas do Lira, Outes, Esteirana, Camelle, Club do Mar, Ponteceso e Laxe. Capítulo á parte merece a eliminatoria entre o Xallas e Muxía, que no partido de ida non chegou á súa fin por incidentes entre xogadores e público, decretando a FGF a súa finalización co marcador do momento (0-0); pero o Xallas non se presentou ao partido de volta xustificándose en posibles represalias por parte dos muxiáns.

Nos oitavos de final, o Cabana partía como favorito, pero o Laxe da Copa non entende de favoritismos e tras empatar nas Redondas, un 2-0 valeulles aos laxenses para pasar de rolda. O Baio estreou campo contra o Corme e o Platas Reinoso ditou sentenza, mentres que o reforzado Nantón sufriu para deixar fóra ao Muxía; o Lira gañou na ida e aguantou un empate co Outes para seguir na competición. O Club do Mar co Camelle, o Ponteceso co Bergantiños B e o Fisterra co Carnota gañaron os dous partidos e non tiveron máis problemas; problemas que tivo o Corcubión contra a Esteirana pois tivo que chegar á quenda de penaltis. Nos cuartos, un interesante Nantón-Club do Mar, que acabou caendo de lado dos cabaneses tras o 2-0 da ida e nova vitoria en Caión (1-2); o Lira sentenciou na ida ante o Corcubión (3-0) e valeulle o empate na volta (1-1). O Baio logrou empatar en Ponteceso (1-1), pero na volta os pontecesáns deron a sorpresa e venceron no Platas Reinoso (0-2); e a traxectoria do Laxe chegou á súa fin en Fisterra, onde perdeu 4-2, non logrando remontar no Cabo de Area (2-2).

Moita igualdade na ida das semifinais: en Portocubelo, o Lira logrou impoñerse pola mínima ao Nantón nun partido ventoso grazas a un gol de Paco; mentres que no Municipal o Ponteceso e o Fisterra empataron, aproveitando os visitantes o autogol de Miguel, que pouco despois igualou Víctor. Na volta, o Nantón pasou por riba do Lira e endosoulle unha goleada (5-0), con goles de Pepe, Nando (2), Juan Bautista (pp) e Víctor Froxán; máis igualada estivo a outra semifinal, na que o Ponteceso volveu pasar unha eliminatoria gañando en campo rival e polo mesmo resultado que co Baio (0-2), mercede aos goles de Verdes e Fariña.

Primeira vez que chegaba o Nantón a unha final da Copa da Costa, mentres que era a quinta para o Ponteceso. O partido de ida xogouse o 15 de xullo nas Fontiñas e o Nantón foi lixeiramente superior e gañou pola mínima (1-0) ao converter Chilín un penalti. O partido de volta veu marcado polas declaracións do presidente pontecesán que afirmou que o Nantón era "una peña de verano que tiene calidad", en relación ás fichaxes que fixo para a Copa, entre as que destacaban Lucho e Chilín, que xogaran na 3ª División ese ano no Ordes. Con todo, o Nantón foi moi superior e axiña sentenciou a final, aínda que o Ponteceso non deu o seu brazo a torcer e pelexou ata o final. Primeira Copa da Costa para un Nantón que sufrira para non descender de categoría na liga, pero as fichaxes deron o seu froito. O centrocampista Lucho, que xa gañara a Copa no 1976 co Dep. Carballo, foi elixido mellor xogador da final (Trofeo Afiga). Os máximos goleadores da Copa foron Manolo II (Fisterra) e Manolito (Club do Mar), con 7 goles.

FINAL IDA (15-07-1990)
C.D. NANTÓN	Carlos, Pensado, Manuel, Cándido, Pepe, Lucho, Nando (Alfredo 69), Chilín, Rogelio, Víctor Froxán, Manolo Froxán.
PONTECESO S.D.	Mazás, Castiñeiras, Miguel, Puga, Fariña, Víctor, Sergio, Adrián, Mato, Verdes, Parga II (Moreno 75).
Goles	1-0 Chilín (p.,15)
FINAL VOLTA (22-07-1990)
PONTECESO S.D.	Mazás, Castiñeira, Miguel, Puga, Fariña, Víctor, Adrián, Mato, Moreno (Parga II 60), Sergio (Pelé), Verdes. Adestrador: Manolo Vidal.
C.D. NANTÓN	Carlos, Pensado, Nando, Cándido, Moreno, Manuel (Pepe 48), Lucho, Rogelio (Carlos Froxán 89), Chilín, Víctor Froxán, Manolo Froxán. Adestrador: José Ramón Bardanca.
Goles	0-1 Víctor Froxán (17), 0-2 Manolo Froxán (56), 0-3 Chilín (61), 1-3 Fariña (p.,65), 2-3 Adrián (83

O CD Nantón gañou a súa primeira Copa da Costa

28ª EDICIÓN – TEMPORADA 1990-91

Equipos participantes	27
Campión	S.D. LAXE
Subcampión	A.D. CLUB DO MAR

Participan 27 dos 30 equipos que disputaron a Liga da Costa (1ª Rexional) e a 2ª Rexional, coas baixas voluntarias de Cando, Carnota e Soneira, e a obrigada do único equipo que quedaba na Preferente (Negreira). Quedaron exentos da primeira rolda a Esteirana, San Lorenzo, Cee, At. Milagrosa e Corme. Das eliminatorias desta rolda a máis significativa foi a que enfrontou ao subcampión da Liga da Costa, Nantón, co campión da 2ª, Muros, que parecía sentenciada co 4-1 das Fontiñas, pero en Miraflores o Muros igualou o resultado nos 90 minutos e sentenciou na prórroga (6-1). Houbo incidentes que non deixaron rematar dous partidos: o Malpica-Camelle da ida (4-0) e o Club do Mar-Lira da volta (3-1). Pasaron con facilidade o Ponteceso, Malpica, Baio, Sp. Zas e Laxe, mentres que sufriron o pase o Muxía, Fisterra, Cabana e Camariñas. Os oitavos de final depararon varios enfrontamentos salientables, por unha parte a rivalidade histórica entre Fisterra e Cee, que se resolveu cun 3-1 para os fisterráns no Ara Solis, e nas Raíces o Cee axiña igualou a eliminatoria, pero nos minutos finais un gol de Marcote deulle o pase ao Fisterra. Por outra banda, Laxe e Corme mostraron a rivalidade da ría, pero os laxenses foron moi superiores nos dous partidos; tamén o foi o Muros no seu derby coa Esteirana e non tivo problemas para conseguir acceder á seguinte rolda. Outro derby municipal deuse entre o Baio e Sp. Zas -primeiro e terceiro na Liga da Costa-, xogados os dous partidos no Platas Reinoso por estar San Andrés en obras: na ida, empate 1-1, e na volta, o Baio adiantouse por dúas veces pero na prórroga pasou o Sp. Zas (3-2). O Club do Mar superou facilmente ao San Lorenzo, o Ponteceso ao Muxía e o Camariñas ao Cabana, mentres que o Malpica tivo que remontar na Pedra Queimada un marcador adverso fronte ao At. Milagrosa.

Nos cuartos, tres eliminatorias quedaron xa case sentenciadas na ida, pois o Club do Mar gañou en Muros (1-3) e o Sp. Zas en Malpica (0-3) e o Ponteceso goleou ao Fisterra (4-1), e os tres certificaron o pase na volta. Máis igualado estivo o duelo Camariñas-Laxe, que tras o 1-1 da ida deparou outro partido igualado na volta, que desnivelou un gol de Sindo no desconto para o Laxe (2-1). Nas semifinais, o Club do Mar enfrontouse ao Ponteceso na Insua e venceu pola mínima (2-1), grazas a dous penaltis covertidos por Manolo Collazo e José Ramón -este no último minuto-, mentres que Mourín empatara para os pontecesáns; na volta no Municipal o Ponteceso adiantouse con dous goles de vantaxe -obra de Mourón e Mourín-, pero no cuarto de hora final o Club do Mar empatou o partido con goles de Manolo Collazo e Rogelio e clasificouse para a final. Na outra eliminatoria, no Platas Reinoso un gol aos dez minutos de cada parte supuxo o empate (1-1) entre Sp. Zas e Laxe: Mato adiantou aos locais, e Pablo empatou para os visitantes; a volta no Cabo de Area trouxo moita emoción e un único gol anotado por Devesa que lle deu o triunfo ao Laxe (1-0).

Quinta final para o Laxe en once anos, e segunda para o Club do Mar de Caión. O partido de ida disputouse no campo da Insua o 30 de xuño, e o Laxe deixou encarrilada a final grazas á súa vitoria por 1-3, e iso que se adiantaron os locais, pero axiña deron réplica os laxenses; no segundo tempo dous goles do xuvenil Ambrosio antes de ser expulsado deixaron un resultado moi bo para os homes de Sindo. Na volta no Cabo de Area, o Laxe non dou posibilidades á reacción e xa aos 2 minutos levaba dous goles, polo que ao Club do Mar só lle quedou marcar o gol da honra contra o final. Terceira Copa da Costa para o Laxe e o equipo caionés que volvía caer nunha final. O máximo goleador da Copa foi Mourón, do Ponteceso, con 9 goles.

FINAL IDA (30-06-1991)
A.D. CLUB DO MAR	Ríos, Luis (Guillermo 34), Loureiro, Manolo Collazo, Xaquín, Valentín, José Collazo, Repi, José Ramón, Agustín, Rogelio (Miguel 60).
S.D. LAXE	Cartajo, Luis, Eladio, Juan, Pol, Sindo (Lolo 75), Ambrosio, Suso, Paco (Carro 28), Lucho, Pablo.
Goles	1-0 José Ramón (15), 1-1 Pablo (24), 1-2 Ambrosio (60), 1-3 Ambrosio (83)
FINAL VOLTA (07-07-1991)
S.D. LAXE	Cartajo, Luis, Eladio, Juan, Pol, Sindo, Ambrosio (Lolo), Pablo, Lucho, Paco, Carro (Tino). Adestrador: Gumersindo Sacedón 'Sindo'.
A.D. CLUB DO MAR	Ríos, Agustín, Loureiro, Manolo Collazo, Xaquín, Valentín, Paco, José Collazo, Miguel, Repi, José Ramón. Adestrador: José Collazo.
Goles	1-0 Pablo (1), 2-0 Lucho (3), 2-1 Miguel (90).

A SD Laxe demostrou que seguía sendo un equipo copeiro

29ª EDICIÓN – TEMPORADA 1991-92

Equipos participantes	28
Campión	U.C. CEE
Subcampión	SP. ZAS

Participan os 26 dos 29 equipos que competiron na Liga da Costa, que novamente volvía estar encadrada na 2ª Rexional en dous grupos, coas baixas voluntarias de Carnota, Coristanco e Monte Louro, e os dous equipos que militaban na 1ª Rexional provincial (Muros e Sp. Zas) para completar un total de 28. Freixo, Nantón, Cee e Camariñas foron os que quedaron exentos da primeira rolda. Varios choques de rivalidade como o At. Mineiro-Xallas, na que pasaron con comodidade estes últimos, ou o Esteirana-Muros, que se dilucidou nos penaltis a favor dos da capital municipal. Tamén nos penaltis pasou o Mazaricos fronte ao Laxe, e na prórroga clasificáronse o Baio contra o Corcubión e o Corme fronte ao At. Milagrosa. O favorito Sp. Zas sufriu para deixar fóra ao Club do Mar, mentres que máis relaxados pasaron o Fisterra, Malpica, San Lorenzo, Muxía, Cabana e Ponteceso.

Nos oitavos, varias eliminatorias destacadas, como a que enfrontou ao Sp. Zas, da 1ª Rexional, co campión da Liga da Costa Norte, o Camariñas, que se resolveu para os zasenses grazas a vitoria no partido de ida (2-0). O campión ligueiro do grupo sur, o Cee, tiña no Baio, terceiro no norte, un difícil rival, pero a vitoria no Platas Reinoso (0-2) facilitou o camiño. Derby municipal entre o campión copeiro, o Nantón, e o Cabana, subcampión do grupo norte, que non tivo historia pois os da capital foron superiores nos dous encontros. O Fisterra goleou no Freixo na ida (1-7) e os outienses non se presentaron á volta. O Muros goleou ao Corme en Miraflores (4-0) e pasou sen problemas, mentres que Mazaricos, Muxía e Xallas, logo de empatar como visitantes na ida, resolveron o pase vencendo na súa casa.

Os cuartos trouxeron a eliminatoria estrela entre os dous equipos da 1ª Rexional, Muros e Sp. Zas disputaron unha eliminatoria máis igualada do que di o marcador final, pois do 1-0 de Miraflores pasouse a un 4-1 en San Andrés, pero o Sp. Zas só conseguiu resolver no segundo tempo. O Fisterra impúxose pola mínima ao Mazaricos en Ara Solis (1-0), e sen que se movese o marcador o árbitro suspendeu o partido de volta no minuto 72 por agresión a un xogador fisterrán e invasión de campo polo público local. O Cee gañou en Muxía (1-2) e rematou a faena con goleada nas Raíces (6-1). Cabana e Xallas igualaron nas Redondas, pero os cabaneses foron superiores na Fontenla (1-2). Nas semifinais, o clásico dos clásicos da Copa da Costa, o Fisterra-Cee, equipos que ademais pelexaron esta temporada polo campionato ligueiro. A ida xogada no Ara Solis foi moi igualada e acabou sen goles (0-0), e igualado foi tamén o partido de volta nas Raíces, ata que no segundo tempo marcou Domingo para os locais; a partir de aí superioridade ceense que certificou cun novo gol de Domingo. No outro choque, o Sp. Zas sentenciou xa na ida vencendo nas Redondas ao Cabana (1-3), e na volta en San Andrés goleou (4-0), cun hat-trick de Mato incluído.

Dous dos favoritos chegaban á final, e para o Sp. Zas era a súa primeira vez, mentres que para os ceenses era a súa quinta. O 28 de xuño xogouse o encontro de ida nas Raíces, e tras unha primeira parte igualada, na que o Cee se foi con vantaxe mínima, no segundo tempo os locais foron moi superiores e deixaron, con tres goles máis, a final sentenciada (4-0). Na volta en San Andrés, o Sp. Zas non se deu por rendido e axiña marcou o gol da esperanza, pero o Cee soubo contrarrestar as intentonas locais e aguantou o marcador ata que nos minutos finais o Zas logrou o segundo, que só certificou a primeira derrota oficial do Cee nesa temporada (2-0). Seguía inmaculado o Cee nas finais, con cinco Copas da Costa nas súas cinco finais disputadas.

FINAL IDA (28-06-1992)
U.C. CEE	José Carlos, Floreal, Sande, Carlos Ares, Juanín, Ramos (Juan Antonio 75), Juan Francisco, Suso, José Manuel, Augusto, Domingo (Jorge 86).
SP. ZAS	Pepe, José, Castelo, Solís, José Zas (Gabín 55), José Antonio, Víctor, Alfonso, Javier (Fatino 76), Felipe, Mato (Chucho 76).
Goles	1-0 Ramos (22), 2-0 Floreal (51), 3-0 Domingo (57), 4-0 Domingo (74).
FINAL VOLTA (05-07-1992)
SP. ZAS	Carlos, José, Alfonso, Gabín, Castelo, Solís, José Antonio (Manolo 70), Víctor, Javier, Mato, Felipe. Adestrador: Moncho Varela.
U.C. CEE	José Carlos, Juanín, Sande, Carlos Ares, Floreal, José Manuel (Juan Antonio 76), Suso, Juan Francisco, Ramos, Augusto, Domingo (Roberto 90). Adestrador: 'Manolín' Oliveira.
Goles	1-0 Felipe (10), 2-0 Víctor (85)

O UC Cee seguía acumulando Copas da Costa

30ª EDICIÓN – TEMPORADA 1992-93

Equipos participantes	30
Campión	U.C. CEE
Subcampión	S.D. FISTERRA

Participan 27 dos 30 equipos que disputaron a Liga da Costa nos seus dous grupos (coas renuncias de Cando e Freixo), e logo dunha votación entre os clubs tamén dos tres equipos da 1ª Rexional (Camariñas, Cee e Sp. Zas) que en principio quedarían exentos da primeira rolda por estar aínda na liga -aínda que houbo que sortear un que xogase para completar o cadro e foi o Sp. Zas-; quen seguía sen participar era o representante na Preferente (Negreira). As sorpresas viñeron da eliminación do Mazaricos, subcampión da Costa sur, co San Lorenzo, e do Muxía, terceiro, coa Esteirana, logo dun partido de volta que tras acabar 4-3 foise á prórroga e rematou cun 7-3 para os esteiráns. O Laxe a piques estivo de sacar o xene copeiro e eliminar ao Nantón, campión da Costa Norte, pero a quenda de penaltis impediuno. Goleadas de Sp. Zas, Club do Mar, Fisterra, Buño, Canota, Cabana e Baio para pasar, mentres máis apertadas estiveron as clasificacións de Corcubión, Lira, Malpica e Muros. Nos oitavos, o Sp. Zas celebraba o título de 1ª Rexional mentres eliminaba ao Club do Mar, e o Nantón goleaba nos dous partidos ao Corcubión; o Fisterra non tiña problemas ante o Lira e o Camariñas gañou na volta para pasar ante a Esteirana. O Carnota, despois de empatar na ida, tivo que remontar un 0-2 na volta para eliminar o Buño, mentres o Muros gañaba con facilidade ao Malpica, e con algunha dificultade máis o Cabana facía o propio co San Lorenzo. Igualada estivo o enfrontamento entre o Cee o Baio, que tras o 2-1 da ida, os baieses só puideron empatar na volta.

Nos cuartos, o Nantón deu a sorpresa ao empatar en Zas (0-0), e con este marcador chegouse aos dez últimos minutos do encontro de volta, pero Chucho deulle o pase ao Sp. Zas (0-1). Sorprendente foi a eliminación do Camariñas polo Fisterra, non porque o campión da Costa Sur o fixese contra un equipo da 1ª, senón porque os camariñáns gañaran no Ara Solis (2-3) e os fisterráns golearon no Hnas. Patiño (1-5). O Cabana gañou en Lombáns ao Carnota (3-4), pero os carnotáns non deron o brazo a torcer e gañaban nas Redondas ata que Lilo marcou o empate a dez para o final (1-1). E competida estivo tamén a eliminatoria Cee-Muros, na que os muradáns gañaban nas Raíces ata que o Cee logrou dous goles case no desconto para remontar (2-1); e na volta en Miraflores non se moveu o marcador e os ceenses lograron o pase (0-0). 

Manolín seguía levantando Copas
da Costa [Foto: LVG]

Nas semifinais, o Fisterra tras eliminar un primeira tocoulle outro, o Sp. Zas; e en San Andrés os fisterráns foron superiores e lograron levar a vitoria (2-3). Na volta, adiantouse o Fisterra no marcador á media hora, pero acto seguido un penalti a favor do Zas, que supoñía a segunda expulsión dun xogador local, podía variar o rumbo da eliminatoria pero Víctor errou o lanzamento e os fisterráns aguantaron numantinamente o marcador (1-0). Na outra, o Cabana foi máis superior na ida ao Cee do que indica o marcador final (1-0), e o partido de volta foi unha tolemia: o Cabana adiantouse con dous goles en menos dun cuarto de hora, pero axiña acurtou distancias o Cee e nos dous últimos minutos da primeira parte marcaron dous goles máis os ceenses; no primeiro minuto da reanudación empatou o Cabana, e o 4-3 chegaría pasados tres minutos do tempo regulamentario, o que causou as protestas cabanesas. Houbo que xogar a prórroga, na que os ceenses foron superiores e lograron dous goles máis para o 6-3 definitivo.

Fisterra e Cee repetían a final da primeira edición da Copa da Costa e era a oitava vez que se enfrontaban na Copa da Costa. Era a sexta final para o Cee, segunda consecutiva, con cinco títulos, e a quinta para o Fisterra con un entorchado. O 20 de xuño xogouse a ida no Ara Solis, e tras un igualada primeiro tempo, os fisterráns adiantáronse ao pouco de comezar o segundo, pero en tres minutos o Cee deulle a volta ao marcador e levou a vitoria no partido (1-2). Na volta, o 27 de xuño, o Cee adiantouse axiña con dous goles, pero o Fisterra puido meterse no partido de non errar José Carlos un penalti que parou o seu tocaio ceense, para acto seguido marcar o Cee o terceiro; cunha segunda parte xa sen emoción chegaron os goles nos minutos finais, cun cuarto para os locais e dobrete de Marco para maquillar o marcador (4-2). O Cee lograba a súa sexta Copa da Costa e tamén o facía o seu adestrador Manolín (catro delas co Cee), nunha edición na que destacou a presenza no equipo ceense dos Sieso, pai e fillo. Os máximos goleadores da Copa foron Lilo (Cabana) e Luis (Fisterra), con 10 goles.

FINAL IDA (20-06-1993)
S.D. FISTERRA	Firucho, Pancho, Gonzalo, Baamonde (José Manuel 89), Mario, Paco, Juan Jesús, Darío, Luis, Marcote (Marco 62), José Carlos.
U.C. CEE	José Carlos, Juan Antonio, Juanín, Sande, Fran, Floreal, Suso (Manolito 78), Sieso Sr. (Ramón 56), José Manuel, Alfredo (Pereira 65), Sieso Jr.
Goles	1-0 Luis (51), 1-1 Juanín (68), 1-2 Pereira (71).
FINAL VOLTA (27-06-1993)
U.C. CEE	José Carlos, José Manuel, Juanín, Sande, Fran, Floreal, Suso (Sieso Sr. 72), Manolito (Palancas 82), Ramón, Sieso Jr., Alfredo (Pereira 62). Adestrador: 'Manolín' Oliveira
S.D. FISTERRA	Firucho, Gonzalo, Lecumberri (Pancho 65), Baamonde, Mario, Paco, Juan Jesús, Darío, Luis, Marcote (Mario 46), José Carlos. Adestrador: Juan Ramón Lobelos.
Goles	1-0 Ramón (15), 2-0 Floreal (19), 3-0 Floreal (p.,40), 4-0 Sieso Jr. (80), 4-1 Marco (84), 4-2 Marco (85).

Seis títulos acumulaba o UC Cee, que repetía campionato